前日開始由屋企翻黎學校時，就一路喉痛痛，結果，都係病咗，唔系我夸大，只係差體溫上升，發燒咋，鼻塞到窒息，暈到所有感官都無曬感覺，退化曬，好彩既係，唔係喺工作既時候病，我從來都覺得呢樣好，休息既時候病，一來可以用緊D quota，病完又可以增強抵抗力，再搏殺，二來可以俾自己名目，睇碟，聽歌，睡覺，你話有乜野係慘得過病咗仲要搏命工作咖？所以，休息時病係咪幾好呢？不過，我係好少係忙既時候病既～～言歸正傳……

 

我在商台的第一日，係2007年12月27日，9點翻到公司，一上去，我就被交咗去一個叫“阿ming”嘅人嘅“手上”，從此呢個人就做咗我既boss。第一次見面嘅感覺，覺得佢幾好人，親切，干練，有一種浪漫氣息，俾佢帶咗去會議室，仲有另一位一起第一日翻既新人，ming問我地鐘意睇D咩野新聞，對邊范有興趣？答案係，我同另一個新人都係鐘意時事嘅，我可以感覺到佢當時有少少失望嘅神情，佢跟住又問我地，你覺得你入到黎，會做D咩野啊？我當時好坦白，“因為我面試嘅時候係面試時事新聞助理嘅～～”招聘時係招節目助理，同時事新聞助理兩個職位嘅，我好清楚記得自己當時接到通知面試嘅電話時，我仲特登問，係邊個部門？答案依然係時事新聞～～所以，我當時就跟住講“我希望我係跟時事組嘅！”另外果位新人就答“其實我無特別鐘意嘅位，我想樣樣都試下～”我聽完就真係想咬自己條脷一下，原來答問題係可以唔洗咁直接咖……

 

我地傾咗一陣，之后ming就帶我地去認識下D同事，大概有一半嘅人都唔係位上，但係人都唔算少，ming好熟練咁叫住每一個人嘅名，仲介紹下佢地係做咩野嘅，發覺大家都係神乎其技，一兼多職，有人同時間寫稿、錄音、準備節目、寫廣播劇、剪接、仲要作曲……當時就傻咗啦～呢間公司D都唔係人黎嘅……等到台长翻咗黎之后，我就被叫咗入佢房，發現除咗佢之外，仲有ming同另一位女士，我向住台长想話展現我最可愛嘅微笑，但係都未笑得出，佢就已經先開聲啦“邊個話你係喺時事組咖？我從來都唔話過你會去時事組！咩野都要做！你以后唔可以引用我講嘅野！！唔可以話“佢話過，可以點樣點樣！！！”……知道未？得啦，你可以出去啦！”佢當時都幾大聲下，我覺得佢係惡嘅！相信無咩野人有咁嘅經驗，返工第一日已經俾個頂級老世鬧到飛起……我好冷靜咁行出果間面試時嘅房，但係好懷疑果間係咪同一間房？房入邊又係咪同一個人？心情很沮喪。我做錯咗D咩野？我只係話我當時係面試時事新聞啫……最慘嘅係，你覺得佢幾好，對佢有好感，覺得有一日可能會鐘意佢——好少女同天真嘅幻想……但係佢唔鐘意你都算啦，仲鬧你……我回到自己嘅座位上，拿起份報紙睇，翻黎翻去都係果幾頁，想起主持人倪萍她曾經說起她上班的第一天，也是這樣的情形，同事又沒人理你，你又沒有事情要做，她說當時眼淚就噼哩叭啦滴在桌面的報紙上，我的位置很小，跟旁邊同事的距離不到20cm，無論如何是哭不出來的啦，但是真的就是在發呆，暗自沮喪中……

 

係好多好多個鐘頭拍烏蠅之后，因為我地暫時都無野做，終于都到咗午飯時間，我同另外個新人一齊吃咗我地唯一嘅一餐飯，因為當時仲咪分組，所以唔知邊D先係你嘅“戰友”，食完飯之后翻到公司，又係自己張臺，又無電腦，就睇雜誌，我一路都同自己講，台长可能係今日心情唔好，唔關你事嘅～～3點，我同位新人又俾人叫咗去會議室，終于有野做啦！ming 同叉姐（台长間房見過嘅另一位女士）布置“功課”，佢地都叫呢樣野係“功課”，就係寫一份點解你想入媒體，想入商台嘅原因，5點前交，有兩個小時寫……無講太多要求，但係要口語話，可以讀出來嘅！

 

出咗會議室就開始揾電腦寫功課，但係大部分嘅電腦都有人用緊，好不容易揾到一部，但係竟然係無『拼音輸入法』嘅，當時就崩潰了～～咁點算啊？我同身邊同事求救～我需要拼音輸入法，同事幫我揾到一個『余氏』輸入法，廣東話拼音，我嘗試咗十分鐘，徹底放棄啦，一個字一個字咁念點拼，打到今晚都沒辦法打完……點算？？？手寫啦！係就係“傳統”D，但係起碼有得交啊～～于是我拿起我本筆記本，一本英語四線大筆記本，上面還有可愛的圖畫，想著先打草稿，然后再抄到白紙上，后來證明，原來，你是永遠都沒有時間再重新抄一次的，構思構思，再構思，要怎么寫？嚴肅？搞笑？文學？最后，我決定寫Sandra風格，就是以下嘅內容，今天公諸于眾……

 

 

點解我要做好呢份工

 

有D人當工作系爱情，你问距点解？ 个答案就好似你问对教堂新人，点解要拉埋天窗？ 因为爱罗！爱一个人需要理由咩？星爷系大话西游度抛出左个问题，拗黎拗去，到今時今日都始終无个答案。 你问我点解要做好呢份工？因为我爱罗！ 有几爱？ 我念住用一世既时间黎回答呢条问题……

 

好多后生仔女都唔知自己想點，想做乜？但係現時嘅我經已揾到方向。Media係我嘅Best choice亦都係我嘅only choice，老土D將句，This is my dream,文雅D講句“無方向嘅船，無論乜野風都唔係順風嘅！”而media就正正係我陣風。有passion唔代表一定可以做好呢份工，但至少當D file堆到成座山咁高，做極都做唔曬嘅時候，我仍然可以同自己講句“撐落去，冇后退！”

 

為咗自己嘅夢想而行出呢一步，我覺得好幸福！

 

點解我可以做好呢份工？咁就要講下我係個點樣嘅人啦！千嬅話自己個心口得個勇字，我個心口就寫住個“搏”字，“搏命”個“搏”，我D Friend成日同我講，Sandra，你唔好當自己係超人！我好清楚知道自己唔可以將條底褲著係出面，更加做唔到超人，但係我控制唔到自己，于是大家俾咗我個“主義”，“完美主義”。

 

我承認，我好貪心，做媒體嘅人不嬲都行係資訊嘅最前邊，我鐘意企係第一現場，迎接突如其來嘅挑戰。唔係話平平穩穩嘅摩天輪唔過癮，只不過，我鐘意過山車同海盜船多D。

 

雖然係咁，并唔代表我係一個沖動嘅人，相反，就算喺勁吵嘅party入邊，我都可以坐埋喺角落頭，當正自己係隱形人，靜靜咁觀察人地嘅一舉一動，睇得細之余，仲會念下，佢係一個點樣嘅人？佢點解會咁做？背后有冇D乜野動機？

 

可能因為我係個好有危機感個人啦！我對自己要求都幾高下，執著于我覺得0岩嘅事，我係咁念嘅，如果你根本唔知點解自己要去做某件事，做出黎就實係一窩泡嘅！如果你明白自己係想做好件事嘅，但係卻求求其其做到便算，你，對唔住自己付出嘅果D時間！

 

愛，口講冇用，你要做咖！

 

我覺得自己好幸運，有今日開始，我又做多樣我好想做嘅野。阿媽，我得咗啦！

 

 

結果係趕唔及再揾張白紙重新再抄一次嘅，不過趕咗係5點前完成，但係我好驚，因為手寫嘅係簡體嘅，如果佢唔識睇簡體點算啊？咁就我讀俾佢聽啦！我當時係完全唔念過佢有可能係唔會聽你讀嘅。所以當我將功課交俾個辦公室秘書時，佢好愕然！你手寫啊？簡體啊？不如我俾張白紙你抄過啦！我望下個鐘，得翻十分鐘，我知道一定抄唔曬，我同佢講，我想讀俾叉姐聽，佢更愕然望著我，拿起電話，打俾叉姐，“Sandra話要讀俾你聽喔～～哦，好啊！”佢話你放低就得啦！

 

就咁，我交咗人生嘅第一份“稿”～～工作嘅第一份“功課”……